Pengelurus Ke Semua Utai Ti Digaga Allah Taala: Bebas

Tabi Menyadi dalam Kristus,

Sepuluh Taun Pengelurus Ke Semua Utai Ti Digaga Allah Taala Ke Diosis Sibu

ari 2017 ngagai 2026: Bebas

Puji ke Allah Taala! Kitai nyambut taun 2019 enggau ati ti pemadu gaga sereta meri terima kasih ke semua berekat ti manah amat udah diterima kitai. Kitai besembiang awakka berekat Allah Taala nurun belama ba semua kitai.

Ngena peluang tu aku madahka rambai jaku kitai ti baru ke taun tu, iya nya, Pengelurus Ke Semua Utai Ti Digaga Allah Taala: Bebas – Ngarapka semua utai ti digaga Allah Taala dilepaska ari tubuh sida ti nemu buruk, lalu bulih pengelepas ti bemulia ti endang enggi bala anak Allah Taala (bdk Rom 8:21)

Injil meri kitai tiga iti utai tu ti manah, iya nya,  Pengelurus, Pengerindu enggau Pengelepas.  Nya meh kebuah Disosis Sibu udah belabuh ngintu Sepuluh Taun Pengelurus Ke Semua  Utai Ti Digaga Allah Taala dalam Taun 2017 ngena rambai jaku Pengelurus Ke Semua Utai Ti Digaga Allah Taala: Meritaka Injil Beserakup Enggau Semua Utai Ti Digaga Allah Taala (Ari Ego ngagai Eko-Kristus), beratka Pengelurus Ke Semua Utai Ti Digaga Allah Taala ngambika chunto, angin, ai, semua utai tumbuh, jelu enggau utai bukai. Utai ti endang amat, iya nya, semua utai ti digaga Allah Taala bisi kuasa idup magang laban Allah Taala empu udah meri sida pengidup. Kitai dekaka pengelurus ukai semina di rumah tauka di endur kitai gawa tang mega ke seluruh Utai ti digaga Allah Taala.

Tang enti nadai pengerindu, kitai enda ulih ngadaka pengelurus. Nya meh kebuah ba taun ti dulu ari tu, rambai jaku kitai Pengelurus Ke Semua Utai Ti Digaga Allah Taala: Aram Meh Belabuh Ari Ruang Bilik Dalam Pengaga Ari Pengerindu, alai semua kitai dipinta belabuh ari ruang bilik kitai empu. Udah nya, nya baru kitai mansang ngagai ruang bilik ke besai agi dalam gerija, mensia mayuh enggau ngagai Semua Utai ti digaga Allah Taala. Enti kitai bisi pengerindu tauka penelap ke pangan baka diri menyadi, nya baru kitai ulih meri sida pengelurus ti patut diberi ke sida.

Kelimpah ari pengelurus enggau pengerindu, kitai mega enda tau enda bisi pengelepas, reti nya, bebas nyadi siku anak Allah Taala. Laban pemendar deka ngelepaska kitai. Sekeda ari kitai tusah deka nemu sapa diri empu laban kitai deka nyadi orang bukai tauka deka nyadi orang ti dikemesaika kitai. Kitai enda ingatka diri  digaga Allah Taala lain ari  mensia bukai laban nadai siku orang di dunya tu sebeka enggau kitai.   Nambahka nya, bebas ukai reti nya kitai tau ngereja sebarang utai peneka ati kitai. Kitai bebas enti kitai enda nyadi ulun utai di dunya, sereta tau milih ‘Ka’ tauka ‘Enggai’. Enti kitai deka bebas, kitai enda tau enda dulu “dilepaska ari” laban enti enda pia, kitai enda ulih “bebas deka”… Enti kitai enda dilepaska ari ngira diri empu aja, ari pemetang, penyai tauka dosa, kitai enda ulih bebas rindu sereta bebas ngereja peneka Allah Taala. Kitai deka dikuasa pengelemi ti bisi ba kitai, tauka pengingin ngiga penguntung, pemansang enggau utai dunya ke diri empu aja.

Nya alai, ngambika ulih diau dalam semangat enggau pemeri bebas, taun tu kitai nitihka jaku Pope Francis dalam Apostolic Exhortation ti pemadu baru “Gaga sereta Lantang: Kangau ngagai Pengudus”, alai semua kitai diperansang ngulihka pengudus ngena jalai beridup enggau Lapan Berekat. Kitai ingatka jaku Kristus, “Beberekat meh sida ke seranta dalam Roh… perintah Serega enggi sida ke baka nya (bdk Mathew 5:3; 19:14). Sapa sida nya? Sida ke seranta, ke enda diguna, ke nadai rumah, ke nadai kereja, ke sunyi, ke tuai sereta enda dapat, sida anak mit ke enda dipeduli sereta diayah, sida ke patu balu enggau kelebih agi sida ke enda diberi peluang ngasaika pengerindu enggau pengasih.  Baka ti udah ditemu kitai, diatu kelebih agi Dunya Kitai ngasaika pemerinsa laban mensia enda peduli sereta amu.

Ketegal  nya, tu meh Kangau Ngerak semua kitai. Kitai dipinta murih gamal Allah Taala, sereta baka Iya laban kitai endang udah ditagaka  Allah Taala ngereja pengawa. Tang enti kitai enda amat bebas, kitai enda ulih nyadi orang ti ditagaka iya. Iya ti bendar, kitai mesti naka ulih ngulihka pengudus. Aram kitai sama nyingkang begulai ngulihka Bebas dalam Pengudus: ngena jalai baruh ati bejalai enggau Tuhan ngereja pengelurus sereta rindu sayauka semua sida ti ngelinggi kitai, enggau semua Utai ti Digaga Allah Taala (bdk Mik 6:8).

Sekali da, aku meri terima kasih ngagai semua kita ke pengawa kita ti enda ulih kira rega enggau ke peneka ati kita nyingkang enggau aku ti Pengibun kita. Aku arap amat ke kitai ti Siti Ruang Bilik Allah Taala ulih bekereja ngaga Diosis kitai lebih beserakup sereta  besemangat, ngambika kitai ulih idup begulai dalam pendiau baka ti asal dikedeka Allah Taala ba kitai ti anak dikesayauka Allah Taala.

Pemela Kita Ti Baruh Pendiau

Bishop Joseph Hii Teck Kwong

Diosis Sibu

‘Ecclesia Christi Sponsa’

Creation Justice: Freedom-Read in 4 Languages